Атырауда рестобарда бойжеткенді ұрған күзетшілерге қатысты тергеу басталды, деп хабарлайды kazlenta.kz тілшісі ҚазАқпарат сайтына сілтеме жасап.
Бойжеткен Instagram-парақшасында жазғандай, рестобардың күзетшілері онымен танысуға талпыныс жасаған. Бірақ, ол бұл ұсыныстан бас тартқан. Содан кейін кикілжің басталған.
«Күзетшілер телефонмен сөйлесуге шыққан мені қайтадан кіргізбей қойды. Олар маған күш көрсетті. Бетімнен бірнеше рет ұрып, жерге құлатты. Сол кезде мені ұрған күзетші басымнан тепті. Полицияға шағым түсірдім. Бірақ, видеожазбаға екі күннен кейін ғана қол жеткіздік», - дейді зардап шеккен бойжеткен.
Атырау облыстық Полиция департаментінің баспасөз қызметінен мәлім еткендей, аталған дерекке қатысты сотқа дейінгі тергеу басталды.
«Атырау қаласындағы рестобарлардың бірінде азаматшаны ұрып-соғу дерегіне қатысты ҚР Қылмыстық кодексінің 293-бабы 2-бөлігімен сотқа дейінгі тергеу амалдары жүргізіліп жатыр. Күдіктілер анықталды. Жәбірленушіге сот-медициналық сараптама тағайындалды. Өзге ақпарат Қылмыстық-процестік кодекстің 201-бабына сәйкес жариялауға жатпайды», - деп мәлім етті департаменттің баспасөз қызметінен.
Еске салайық, бұған дейін Атырауда болған өзге оқиға жөнінде жазған едік. Бес жігіт көпқабатты тұрғын үйдің алдында төбелескен. Олар учаскелік полиция қызметкерлерінің талабына бағынбай, қарсылық танытқан.
Учаскелік полиция инспекторлары 32-38 жастағы жігіттерге қатысты ҚР Әкімшілік құқық бұзушылық туралы кодексінің 434-бабының 1, 2-бөлімдерімен, 667-бабының 1-бөлімімен әкімшілік хаттама толтырды. Жинақталған іс құжаттары сотқа жолданды. Сот шешімімен кінәлілерге 5 күннен 20 күнге дейін әкімшілік қамауға алу жазасы тағайындалды.