Қазақстан Тәжікстанға натрий цианидін жеткізуді жалғастырады. Бұл туралы елордада өткен бизнес-форумда ҚР Индустрия және инфрақұрылымдық даму вице-министрі Динара Щеглова айтты, деп хабарлайды kazlenta.kz тілшісі ҚазАқпарат сайтына сілтеме жасап.
«Тәжікстан Республикасының кәсіпорындары үшін натрий цианидін («Talas Investment Company» ЖШС) жеткізу көлемі жыл сайын артып келеді. Біз бұл жеткізілімдер бүгін Қазақстан мен Тәжікстан арасында қол қойылатын бірлескен іс-қимыл жоспары аясында бекітіледі», - деді Д. Щеглова.
Оның айтуынша, Қазақстаннан глинозем жеткізу көлемі өсіп келеді. 2023 жылдың бірінші тоқсанында 23,07 мың тонна тасымалданып, бұл көрсеткіш 2022 жылға қарағанда 27 пайызға артық болды.
«Бұдан бөлек, медициналық жабдықтарды жеткізу бөлігінде ынтымақтастықты кеңейтуді ұсынып отырмыз», - деді Динара Щеглова.
Бұдан бұрын хабарланғандай, ҚР Премьер-Министрдің орынбасары – Сауда және интеграция министрі Серік Жұманғарин Қазақстан-Тәжістан бизнес форумы аясында түске дейін бизнесмендер арасында 1 млрд 300 млн доллардың келісімшартына қол қойылғанын айтты.