«Шымкент» әйелдер футбол клубы кезекті рет жемісті жеңісімен жерлестерін қуантты. Олар кіл мықты екендіктерін дəлелдеп, Қазақстан чемпионатында 12-рет үздік деп танылып, рекорд орнатты. Мегаполистің спорттағы саңлақтары, футболдан əйелдер командалары арасындағы Қазақстан республикасы чемпионатының жеңімпаздарын - “Қажымұқан” атындағы орталық стадионда қала əкімі Мұрат Әйтенов пен Қазақстан футбол федерациясының президенті Әділет Барменқұлов құттықтады.
«Шымкент» әйелдер футбол клубы бүгінде Республика деңгейінде ғана емес, төрткүл дүниеде теңбіл доптың шеберлері ретінде әлемдік көшбасшылардың біріне айналып үлгерді. Айталық, Чемпиондар Лигасында үш мәрте 1/8 финалында ойынын көрсетті. Олар әлемдік аренада Қазақстанның атынан туған қаламыз Шымкентті танытып, 12 мәрте ел кубогында да топ жарды. Ал бүгінде «Шымкент» командасы кезекті рет Қазақстанның үздігі атанып, Қазақстан чемпионатында жеңімпаз ретінде танылды. Осылайша, ел тарихында бұрын соңды болмаған рекордты орнатып отыр. Шаһар басшысы шымкенттік шырайлыларды құттықтап, бұл өз кезегінде үлкен жетістік екенін айта келе, алдағы уақытта да сəттіліктің серіктері болуына тілектестігін білдірді.
Арулардан құралған аяқ доп шеберлері қазіргі таңда УЕФА-ның үздік 20 командасының қатарына кіреді. Еуропалық футболдың «Барселона», «Бавария», «Лион», «Манчестер Сити» секілді алыптарымен жасыл алаңда теңдей ойнауға қауқарлы. Футболшы қыздарымыз Қазақстан ұлттық құрамасының негізгі ойыншылары боп табылады. Қазақстан чемпионатында олар 2019 жылға дейін «Қазығұрт» атауымен танылып келген. Ал қазіргі таңда аталмыш «Шымкент» əйелдер футбол командасында 17 мен 35 жас аралығындағы нəзік жанды ойын көрсетеді. «Шымкент» спорт клубында мұнан өзге жүздеген таланттар да өздерін танытуда. Бұл орайда, спорт ұжымының атқарып отырған еңбектерінің нəтижесі жыл сайын жаңа межеге жетіп, биік белестерді бағындырып келеді.
Сондай-ақ , осы кеште Қазақстан премьер лигасында оңтүстіктің “Ордабасы” командасы Қарағандының “Шахтер”-ын өз алаңында қабылдап, 1-0 есебімен жеңіске жетті.
Жеңімпаздарды шын жүректен құттықтаймыз!