Түркістан облысында күдіктінің басына қап кигізіп, қылмысты мойындатпақ болған полиция қызметкерлері қамауға алынды. Бұл туралы облыстық прокуратура ресми мәлімет берді, деп хабарлайды ҚазАқпарат-қа сілтеме жасаған kazlenta.kz
Облыстық прокуратураның хабарлауынша, қазіргі таңда сотқа дейінгі тергеп-тексеру бойынша Сауран аудандық полиция бөлімінің төрт криминалдық полиция қызметкеріне қатысты тергеу жүргізілуде. Күдікті деп танылған тәртіп сақшыларының екеуі жұмыстан босатылған.
«Қазір Арнайы прокурорлар басқармасының өндірісінде Н.Өмірбековтың арызы бойынша Сауран аудандық полиция бөлімінің қызметкерлеріне қатысты Қылмыстық кодекстің 146-бабы 2-бөлігі 1,2-тармақшалары бойынша сотқа дейінгі тергеп-тексеру жүргізілуде. Түркістан қаласының мамандандырылған тергеу сотының қаулыларымен жоғарыда көрсетілген 4 күдіктіге қатысты екі айға дейінгі мерзімге «күзетпен ұстау» түріндегі бұлтартпау шарасын қолдануға санкция берілді. Түркістан облысының прокуратурасына Н.Өмірбековтен Сыбайлас жемқорлыққа қарсы қызметінің Түркістан облысы бойынша департаментінің тергеушісі тарапынан моральдық қысым көрсетілгені туралы жазбаша шағымы түспеген», - делінген облыстық прокуратураның ресми хабарламасында.
Еске салайық, бұған дейін әлеуметтік желіде полиция басқармасында азапталған ер адамның дауысы жазылған видео жарияланған еді. Тексеру кезінде бұл бейнежазбаның Сауран аудандық полиция бөлімінде түсірілгені анықталған. Яғни қой ұрлағаны үшін күдікті ретінде ұсталған азамат өзіне полицейлер күш көрсеткенін айтқан. Тіпті, басына қап кигізіп, ұрып-соққанын жеткізген еді.