Жетісу облысында қоғамдық тәртіпті сақтау және құқық бұзушылықтардың алдын алу мақсатында түнгі рейдтер жүргізілді, деп хабарлайды kazlenta.kz тілшісі Polisia.kz сайтына сілтеме жасап.
Талдықорған қаласында полиция қызметкерлері прокуратура өкілдерімен бірлесіп, бес ойын-сауық орнын тексерді. Мекеме әкімшіліктеріне заң талаптарын сақтау және құқық бұзушылықтарға жол бермеу жөнінде түсіндіру жұмыстары жүргізілді. Патрульдеу барысында қоғамдық орындарда алкогольдік масаң күйде жүрген бес адам анықталды. Сонымен қатар алкоголь өнімдерін сату қағидаларын бұзған үш дүкен тіркелді.
Бұдан бөлек, полицияның арнайы есебінде тұрған 17 азаматтың тұрғылықты мекенжайы тексерілді. Мұндай профилактикалық іс-шаралар құқық бұзушылықтардың алдын алуға, қоғамдық тәртіпті сақтауға және тұрғындардың қауіпсіздігін қамтамасыз етуге бағытталған. Рейдтер алдағы уақытта да жалғасады. Полиция азаматтарды заң талаптарын сақтауға және қоғамдық тәртіпті бұзбауға шақырады.