Елордада 2026–2027 жылдардағы жылыту маусымы кезеңінде жеке тұрғын үй секторында өрт қауіпсіздігін қамтамасыз ету мақсатында кешенді профилактикалық жұмыстар жалғасып жатыр, деп хабарлайды kazlenta.kz тілшісі Елорда әкімдігінің ресми сайтына сілтеме жасап.
Астана қаласының Төтенше жағдайлар департаментінің мәліметінше, 15 тамыздан бері мамандар 2 900 үйді аралап шықты. Олардың қатарында халықтың әлеуметтік осал топтарына жататын отбасылардың үйлері де бар.
Үйлерді аралау барысында мамандар жылыту жүйелері мен электр сымдарының жай-күйін тексеріп, тұрғындарға түсіндіру жұмыстарын жүргізеді және практикалық көмек көрсетеді.
200-ден астам үйге иіс газы мен табиғи газдың таралуын анықтайтын датчиктер, сондай-ақ түтін хабарлағыштары орнатылды. 35 үйдің мұржасы тазартылды. Сонымен қатар мамандар бұрын орнатылған автономды өрт хабарлағыштарының қуат элементтерін ауыстырып жатыр.
Профилактикалық аралау жұмыстары күн сайын полиция қызметкерлері, жергілікті атқарушы органдардың, «АРЭК» мамандары және еріктілер қатысуымен жүргізіледі.
Астана қаласының Төтенше жағдайлар департаменті тұрғындарға өрт қауіпсіздігі талаптарын сақтау қажеттігін ескертеді. Жанып тұрған пештер мен қосулы электр жылытқыштарын қараусыз қалдыруға болмайды. Жылыту жүйелері мен электр сымдарының жарамдылығын қадағалап, мұржаларды уақытылы тазалап отыру маңызды.
Өрт немесе басқа да төтенше жағдай туындаған кезде дереу 112 нөміріне хабарласу қажет.