Абай облысында патрульдік көліктер жол қозғалысын заманауи кешендермен бақылайды, деп хабарлайды kazlenta.kz тілшісі Polisia.kz сайтына сілтеме жасап.
Жыл басынан бері Абай облысының жолдарында 75 адам қаза тапты. Жол-көлік оқиғаларының алдын алу және қауіпті құқық бұзушылықтарды анықтау мақсатында өңір полициясы заманауи фото және бейнефиксация жүйелерін қолданады. Облыс жолдарында "EKIN BOX SPOTTER", "EKIN Patrol G2" және "SERGEK PATROL BOX" кешендері жұмыс істейді. Атап айтқанда, патрульдік көліктерге орнатылған 12 "EKIN Patrol G2" мобильді кешені қала сыртындағы тасжолдарда жол қозғалысы ережелерінің сақталуын бақылауға мүмкіндік береді. Жыл басынан бері осы кешендердің көмегімен 35 432 құқық бұзушылық тіркелген. "EKIN Patrol G2" тоғыз камерадан тұрады. Оның сегізі қызметтік көліктің төбесіндегі жарық панеліне орнатылса, біреуі салонда орналасып, полиция қызметкерлерінің әрекетін тіркейді. Жүйе шамамен 360 градусты қамтиды, мемлекеттік нөмірлерді таниды, жолдағы жағдайды бейнетаспаға түсіреді және көліктердің қозғалыс жылдамдығын алдыңғы бағытта бес жолаққа дейін өлшейді.
Құқық бұзушылық анықталған кезде мәліметтер полиция қызметкерінің планшетіне түсіп, растайтын материалдармен бірге серверге жіберіледі. Кешен көлік қозғалысы кезінде де, тоқтап тұрған кезде де, тіпті қозғалтқыш өшірулі болған жағдайда да жұмыс істей алады. Ал қараңғы уақытта түсірілім инфрақызыл датчиктер арқылы жүзеге асырылады. 28 маусымнан бастап патрульдік көліктерде бес "SERGEK PATROL BOX" кешені де қолданыла бастады. Олардың көмегімен 2 675 құқық бұзушылық тіркелген. Жалпы, жыл басынан бері облыс жолдарында автоматты және мобильді фиксация жүйелері арқылы 193 мыңнан астам жол қозғалысы ережесін бұзу дерегі анықталған. Заманауи технологияларды қолданудың басты мақсаты — жол-көлік оқиғаларын азайтып, адам өмірін сақтау. Полиция жүргізушілерді жылдамдық режимін сақтауға, қауіпсіздік белдігін тағуға, қауіпті басып озудан аулақ болуға және көлік жүргізу кезінде телефонға алаңдамауға шақырады.