«QazaqGaz» ҰК» АҚ-да мемлекеттік органдардың бастамасымен отандық тауар өндірушілерді қолдау мәселелері бойынша кезекті дөңгелек үстел өтт, деп хабарлайды kazlenta.kz тілшісі ҚР Энергетика министрлігіне сілтеме жасап.
Дөңгелек үстел жұмысына Энергетика министрлігі Жер қойнауын пайдалану департаментінің Жер қойнауын пайдалануды дамыту басқармасының басшысы Бағлан Сембекова, ҚР ҰКП «Атамекен» Басқарма төрағасының орынбасары Мұратбек Маханов, Машина жасаушылар одағы Басқарма төрағасының орынбасары Ерқанат Маканов, сондай-ақ «Самұрық-Қазына Контракт» ЖШС өкілдері қатысты.
QazaqGaz ұлттық компаниясының Сатып алу және қамтамасыз ету жөніндегі басқарушы директоры Алмас Ақыловтың хабарлауынша, биыл QazaqGaz компаниялар тобы шеңберінде ҚҚС-ты есептемегенде 3 млрд теңгеден астам сомаға офтейк-келісімшарттар жасалған. Жыл соңына дейін 4 млрд теңгеден астам сомаға қосымша келісімшарттар жасасу жоспарлануда.
QazaqGaz компаниялар тобының отандық тауар өндірушілердің қатысуымен жүзеге асырған сатып алуларының жалпы көлемі биыл 7,9 млрд теңгеден асып отыр. Бұл көрсеткіштер QazaqGaz-дың сатып алудағы отандық тауарлардың үлесін арттыру және офтейк-келісімшарттар жүйесін жетілдіру жөніндегі мемлекет басшылығының тапсырмаларын орындап отырғанын көрсетеді.
Дөңгелек үстел барысында «Интергаз Орталық Азия» АҚ мен «Zhaik Electric» ЖШС арасында дәнекерлеу агрегатын жеткізу бойынша, сондай-ақ «PRODCORE» ЖШС-мен газ айдау агрегатын автоматты басқару жүйесін жеткізу бойынша офтейк-келісімшарттарға қол қойылды.
Отандық өндірушілермен ынтымақтастықты дамыту мақсатында «Интергаз Орталық Азия» АҚ «БатысМұнайГазЖабдықтары» ЖШС, «Қазақстандық металл конструкциялар зауыты» ЖШС және «ТЭМПО – Қазақстан» ЖШС-мен газ қысымын реттегіштерді, тез ажыратылатын құрылғыларды және болат құбырларды жергіліктендіру бойынша меморандумдарға қол қойды.
Дөңгелек үстелге қатысушылар QazaqGaz-дың отандық өндірушілердің газ саласын дамытуға қатысуын тұрақты түрде кеңейтіп, қолдап келе жатқанын атап өтті.