Тараз қаласында полиция қызметкерлері есірткі құралдарының заңсыз айналымына күдікті 56 жастағы ер адамды ұстады, деп хабарлайды kazlenta.kz тілшісі Polisia.kz сайтына сілтеме жасап.
Күдікті басқарған көлікті тінту барысында жол сөмкесінен 12,3 келі кептірілген марихуана және 264,58 грамм гашиш тәркіленді. Сонымен қатар оның тұрғылықты жеріндегі балконнан тағы 124,38 грамм гашиш табылды. Алдын ала мәлімет бойынша ер адам есірткі заттарын Байзақ ауданының аумағынан жинап, сақтаған.
Күдікті өзіне тиесілі автокөлікпен Жуалы ауданына қарай бара жатқан кезінде ұсталды. Тергеу барысында ер адам кінәсін мойындаған. Аталған дерек бойынша есірткі заттарын аса ірі мөлшерде өткізу мақсатында заңсыз сатып алу, сақтау және тасымалдау фактісі бойынша сотқа дейінгі тергеп-тексеру басталды. Қазіргі уақытта қылмыстық іс бойынша тергеу амалдары жүргізіліп жатыр.