Түркістан облысында полицейлер шетел азаматтарының Қазақстан Республикасында болу тәртібін сақтауына және көші-қон заңнамасының талаптарының орындалуына тұрақты бақылау жүргізіп жатыр, деп хабарлайды kazlenta.kz тілшісі Polisia.kz сайтына сілтеме жасап.
Осы бағыттағы профилактикалық іс-шара Төлеби ауданында ұйымдастырылды. Аудандық полиция бөлімінің көші-қон қызметі мен учаскелік полиция инспекторлары демалыс орындары, ауылдық және таулы аймақтардағы нысандарды аралап, шетел азаматтарының құжаттары мен ел аумағында болу заңдылығын тексерді.
Шара барысында 70-тен астам шетел азаматы полицияға жеткізіліп, олармен профилактикалық жұмыс жүргізілді. Кездесуге полиция бөлімінің басшылық құрамы, аудандық ішкі саясат бөлімінің басшысы және теолог маман қатысты. Сонымен қатар шетел азаматтары тұратын аулалар тексеріліп, Қазақстан аумағында болу тәртібі мен заң талаптарын сақтау жөнінде түсіндірме берілді. Полиция көші-қон саласындағы заң бұзушылықтардың алдын алу және қоғамдық қауіпсіздікті қамтамасыз ету бағытындағы жұмыстарды тұрақты түрде жалғастырады.