Қарттар күні қарсаңында Астанада аға буын өкілдерінің белсенді өмір салтын ұстануына және шығармашылық белсенділігін арттыруға бағытталған «Әсем қимыл – әдемі ғұмыр» би фестивалі өтті, деп хабарлайды kazlenta.kz тілшісі ҚР ЕХӘҚМ баспасөз қызметіне сілтеме жасап.
Іс-шараны Белсенді ұзақ өмір сүру орталығы ұйымдастырды. Фестивальге елорданың алты ауданындағы әлеуметтік қызмет көрсету бөлімшелерінде қызмет алатын зейнеткерлер қатысты.
Қатысушылар ұлттық, классикалық және заманауи би бағыттарымен қатар, әлем халықтарының билерін орындап, өз өнерлерін ортаға салды.
Фестивальдің негізгі мақсаты – аға буын өкілдерінің белсенді әрі мазмұнды демалысын ұйымдастыруға жағдай жасау, олардың физикалық және әлеуметтік белсенділігін қолдау, шығармашылық әлеуетін дамыту және әлеуметтік байланыстарын нығайту.
Фестиваль қорытындысы бойынша бірінші орынды Сарайшық ауданынан келген «Сымбат» би тобы иеленді. Екінші орын Есіл ауданының «Ханшайым» тобына, үшінші орын Сарыарқа ауданының «Сарыарқа» тобына берілді. Сондай-ақ фестивальге қатысқан өзге де ұжымдар түрлі номинациялар бойынша марапатталды.
Мұндай іс-шаралар – Белсенді ұзақ өмір сүру орталықтарының жұмысының негізгі бағыттарының бірі. Бұл орталықтарда аға буын өкілдеріне өзара қарым-қатынас орнатуға, шығармашылықпен айналысуға, дене белсенділігін арттыруға және қоғамдық өмірге белсенді араласуға мүмкіндік беріледі.
Бүгінде Қазақстанда 132 Белсенді ұзақ өмір сүру орталығы жұмыс істейді. Оның 6-уы Астана қаласында орналасқан.