Жаңаөзен қаласында "Қарасора" жедел-профилактикалық іс-шарасы аясында полиция қызметкерлері психотроптық заттардың заңсыз айналымына күдікті ер адамды ұстады, деп хабарлайды kazlenta.kz тілшісі Polisia.kz сайтына сілтеме жасап.
13 қыркүйекте Теңге ауылындағы азық-түлік дүкендерінің бірінің маңында 29 жастағы ер адам ұсталды. Жеке тінту барысында күдіктіден ақ түсті ұнтақ тәрізді зат салынған 9 пакет, ақша қаражаты және телефон тәркіленді. Кейін күдікті полиция қызметкерлеріне психотроптық заттар жасырылған орындарды өз еркімен көрсетті. Аталған жасырын орындардан тағы 9 пакет тәркіленді. Сараптама қорытындысына сәйкес, тәркіленген заттардың құрамынан 4-метилметкатинон (мефедрон) анықталды.
Зерттеу нәтижесінде заттың жалпы салмағы 1,65 граммды құраған. Алдын ала мәлімет бойынша, күдікті психотроптық заттарды әрі қарай өткізу мақсатында Ақтау қаласынан Жаңаөзен қаласына тасымалдаған. Аталған факті бойынша Қазақстан Республикасы Қылмыстық кодексінің 297-бабы бойынша қылмыстық іс қозғалды. Күдікті ұсталып, уақытша ұстау изоляторына қамалды. Қазіргі уақытта тергеу амалдары жүргізілуде. Тергеу мүддесіне байланысты өзге ақпарат жария етілмейді.