Ауғанстанның солтүстігінде Құндыз провинциясындағы Сеид-Абад шейіттер мешітінде қуатты жарылыс болып, салдарынан 100 адам қаза тапты және ондағаны жарақат алды. Террорлық шабуыл 8 қазан, жұма күні түстен кейін болды, деп хабарлайды Tengrinews.kz.
Қайтыс болғандар мен зардап шеккендердің барлығы мешітке келушілер екені анықталды. Террористер адам көп жиналатын жұма күнін арнайы таңдаған.
Қайғылы оқиға орнынан кадрлар Twitter-ге Yamal News арнасы таратты.
"Талибан" қозғалысы (Қазақстанда тыйым салынған) Құндыз провинциясындағы жарылысты айыптап, кінәлілерді жазалауға уәде берді.
"Ислам әмірі бұл қорқынышты әрекетті құптамайды, осы қорқынышты қылмыс үшін кінәлілерді тауып, жазалауға уәде береді", - деп жазды "Талибанның" ресми өкілі Забихулла Мужахид Twitter-де. Оның айтуынша, жарылыс орнына арнайы жасақ келіп, тергеу жүріп жатыр.
Бұл жарылыс туралы БҰҰ Бас хатшысы Антонио Гутерриш де өз ойын білдірді.
"Бас хатшы, бұл варварлық жарылыс кезінде қаза тапқандар мен зардап шеккендердің отбасыларына көңіл айтады", - деді Бас хатшының өкілі Стефан Дужаррик.
Өз кезегінде, мәдениет жөніндегі "Талибан" комиссиясының мүшесі Мохаммад Джалал әлеуметтік желіде теракті "Ислам мемлекеті" экстремистік ұйымының тармағы "Хорасандағы Ислам мемлекеті" тобының содырлары жасағанын хабарлады.