Астанада өзін-өзі жұмыспен қамтыған жастар арасында есірткі қылмысының алдын алуға және салауатты өмір салтын қалыптастыруға бағытталған спартакиада басталды. Іс-шара «Астана – есірткісіз қала» ұранымен өтуде, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Спартакиаданың негізгі мақсаты – жастарды спортқа және басқа да пайдалы іс-шараларға тарту, олардың бос уақытын мазмұнды өткізуіне жағдай жасау, сондай-ақ есірткі құқық бұзушылықтарының алдын алу бағытындағы профилактикалық жұмыстарды күшейту.
Астана қаласы Полиция департаменті Есірткі қылмысына қарсы іс-қимыл басқармасының бөлім бастығы, полиция подполковнигі Әлия Қибатқызының айтуынша, спартакиадаға 18 бен 35 жас аралығындағы жастар қатысуда.
«Бүгінгі іс-шараға қатысуға 300-ге жуық адам ниет білдірді. Алдын алу жұмыстары жан-жақты болуы керек. Сондықтан спартакиада бірнеше кезеңге бөлінді», – деді Әлия Қибатқызы.
Күннің бірінші жартысында шағын футбол мен волейболдан жарыстар өтуде. Одан кейін спорттық бағдарлама М. Өтемісов атындағы Оқушылар сарайында жалғасады. Онда қол күресі, гір көтеру, кермеге тартылу және арқан тартудан жарыстар, сондай-ақ пенчак-силаттан көрсетілімдік жаттығулар өткізу жоспарланған. Спартакиада жеңімпаздарды марапаттау рәсімімен аяқталады. Жүлдегерлерге ақшалай сыйлықтар қарастырылған.
«Біз мектептерде, колледждерде, жоғары оқу орындары мен мемлекеттік ұйымдарда профилактикалық жұмыстар жүргіземіз. Алайда кейде өзін-өзі жұмыспен қамтыған жастар назардан тыс қалып жатады. Олар жұмыс істеп, өз бетінше табыс табатындықтан, біздің дәрістеріміз бен семинарларымызға қатыса алмауы мүмкін. Сондықтан осы жастар арасында осындай ауқымды іс-шара өткізуді ұйғардық», – деп түсіндірді Әлия Қибатқызы.
Жарысқа қатысушылардың бірі – Zigizagi командасының мүшесі Бекзат Ермекбай. Ол спартакиада туралы Instagram әлеуметтік желісінен біліп, онлайн өтінім берген.
«Мен алғаш рет қатысып тұрмын. Көңіл күйіміз өте жақсы. Шағын футболдан чемпион атанамыз деп үміттенемін», – деді қатысушы.
Оның пікірінше, жастарға арналған мұндай спорттық іс-шараларды жиі өткізу қажет.
Іс-шараны ұйымдастыруға Oyan қозғалысының еріктілері де атсалысуда. Олар қатысушыларды тіркеуге көмектесіп, қонақтарға жарыс алаңдарында бағыт-бағдар беріп, тәртіпті қадағалауда.
Еріктілер қозғалысының жетекшісі Сабина Жұматаева олардың тобында 75-ке жуық адам бар екенін және жаз бойы түрлі іс-шараларға қатысқанын айтты.
«Менің ойымша, мұндай іс-шаралар ең алдымен жастарға өте жақсы әсер етеді. Өзім де басқа жастардың ойынға қатысып, салауатты әрі белсенді өмір салтын қолдайтынын көрсеткенін тамашалағанды ұнатамын. Бұл өзгелерге үлгі болады», – деді Сабина Жұматаева.
Еріктінің айтуынша, профилактикалық іс-шаралардан кейін жастар белсенділерге келіп, алған әсерлерімен бөлісіп, мұндай акциялардың оларды ойлануға жетелегенін айтады.
«Салауатты өмір салтын ұстаныңыздар, өмірді сүйіңіздер және бақытты болыңыздар», – деді ол жастарға.
Спартакиаданы Астана қаласының Полиция департаменті, елорданың Сарыарқа ауданының әкімдігі, «Астана жастары» жастар ресурстық орталығы, қалалық Білім басқармасы және «Пенчак силат» заңды тұлғалар бірлестігі ұйымдастырып отыр.