Алматы облысының әкімі Марат Сұлтанғазиевтің төрағалығымен және ҚР Сыртқы істер министрінің орынбасары Әлібек Қуантыровтың қатысуымен өңірлік инвестициялық штаб отырысы өтті. Онда облыста қолға алынған инвестициялық жобалар мен оларды іске асыру барысында туындаған мәселелерді шешу жолы талқыланды, – деп хабарлайды kazlenta.kz тілшісі Алматы облысы әкімінің баспасөз қызметіне сілтеме жасап.
Инвестициялар көлемі бойынша өңір республикада 6-орында тұр. Жыл басынан бері жалпы құны 121,7 млрд теңге болатын 35 инвестициялық жоба жүзеге асырылған. Жыл соңына дейін тағы 77 инвестициялық жобаны іске асыру жоспарланған. Оның жалпы құны – 627 млрд теңге.
Жиын барысында аймақ басшысы Президент тапсырмасына сәйкес 2026 жылдың басында өңірлік инвестициялық штаб құрылғанын айтты. Оның құрамына Президент Әкімшілігінің өкілдері, облыс прокуроры, облыстық басқармалар мен аумақтық департаменттер, «Қазақ Инвест» ұлттық компаниясы, Кәсіпкерлер палатасы, салық органдарының басшылары енгізілген.
Әлібек Сәкенұлы өз сөзінде инвестиция тартудың жаңа тәсілдері туралы баяндап, бұл бағытта өңірде атқарылып жатқан жұмыстарды жоғары бағалады. Айтуынша, Үкімет 2029 жылға қарай ұлттық экономикадағы қаржыны 450 млрд АҚШ долларына жеткізіп, шетелден кемінде 150 млрд АҚШ доллары көлемінде инвестиция тартуды көздеп отыр.
«Бүгінде Алматы облысында отандық және шетелдік инвестиция тарту бағытында жүйелі әрі белсенді жұмыс жүргізілуде. Соның нәтижесінде бірқатар ірі жобалар іске асырылуда. Олардың қатарында «PepsiCo Central Asia», «Carlsberg Kazakhstan», «Mars Petcare Kazakhstan», «YTO Express» сияқты компаниялардың жобасы бар. Бұл өндіріс қуатын арттыруға, озық технологияларды енгізуге және бәсекеге қабілетті өнім шығаруға бағытталған», – деді министрдің орынбасары.
Штаб отырысы одан әрі сұрақ-жауап форматында жалғасып, қатысушылар өз ұсыныс-пікірлерін ортаға салды.
Жиынды қорытындылаған Марат Елеусізұлы бұл бағыттағы жұмыстар алдағы уақытта да жүйелі түрде жалғасатынын айтты.
«Біздің басты мақсатымыз – тек инвестиция көлемін ұлғайту емес, сонымен бірге аймақ экономикасының ұзақ мерзімді өсімін қамтамасыз етуге ықпал ететін сапалы жобаларды жүзеге асыру», – деді аймақ басшысы.