Мемлекет басшысы Қасым-Жомарт Тоқаев Бұқаралық ақпарат құралдары қызметкерлерінің күні қарсаңында отандық журналистиканың дамуына елеулі үлес қосқан бірқатар БАҚ өкілдерін мемлекеттік наградалармен марапаттады. Олардың қатарында маңғыстаулық белгілі журналист, облыстық «Маңғыстау» газетінің еңбек ардагері Айсағали Қыдыров «Құрмет» орденіне ие болды.
Айсағали Тәжібайұлы еңбек жолын 1978 жылы Ақтау қаласында «Коммунистік жол» облыстық газетінде тілші болып бастаған. Саналы ғұмырын журналистика саласына арнаған қаламгер өңірлік баспасөздің қалыптасуы мен дамуына сүбелі үлес қосты.
Қырық жылдан астам уақыт ішінде ол әлеуметтік-экономикалық, қоғамдық-саяси және мәдени-рухани тақырыптарды терең қозғап, сараптамалық мақалалар, өткір сұхбаттар мен мазмұнды очерктер жариялады. Оның қаламынан туған көптеген материалдар қоғамдағы өзекті мәселелердің шешімін табуына ықпал етті.
Айсағали Қыдыров тек журналист ретінде ғана емес, фотожурналистика саласында да өзіндік қолтаңбасын қалыптастырған маман. Ол фототілші, тілші қызметтерін атқара жүріп, өңірдің шежіресін сурет пен сөз арқылы сабақтастыра білді.
Қаламгердің шығармашылық мұрасы газет беттерімен ғана шектелмейді. Ол өңір тарихын зерделеп, еңбек адамдарының тағдырын арқау еткен «Маңғыстау балықшылары» және «Маңғыстаудағы алғашқы автошаруашылық» кітаптарының авторы. Бұл еңбектер Маңғыстаудың өндірістік және әлеуметтік даму тарихын кейінгі ұрпаққа жеткізген құнды зерттеулер саналады. Сонымен қатар Айсағали Қыдыров Түпқараған ауданының тарихы баяндалатын «Қарашаңырақ» кітабының жаңартылған редакциясын әзірлеуге үлес қосты.
Поэзияны серік еткен журналист портреттік очерктері мен эсселері арқылы оқырман ықыласына бөленіп, ұлттық руханиятты насихаттауға еңбек сіңірді. Оның шығармашылығында азаматтық ұстаным, қоғамдық жауапкершілік және кәсіби адалдық айқын көрініс табады.