Алматы әкімі Дархан Сатыбалды алдағы жылыту маусымына қала инфрақұрылымын дайындау мәселелері бойынша кеңес өткізді. Бүгінде тіршілікті қамтамасыз ету нысандарының жалпы дайындық деңгейі 50,5 пайыз, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Кеңес барысында жылумен, электр қуатымен, газбен және сумен жабдықтау жүйелерін дайындау жұмыстарының қарқыны, сондай-ақ тұрғын үй қоры мен әлеуметтік нысандардың әзірлігі қаралды. Әсіресе, орталықтандырылған жылу жүйесіне қосылған көпқабатты тұрғын үйлерге баса назар аударылды. Қазіргі уақытта осындай 9 283 тұрғын үйдің 984-і дайындық актілерін алған. Инженерлік жүйелерді дайындау жұмыстары 10 қыркүйекке дейін толық аяқталуға тиіс.
Сонымен қатар коммуналдық кәсіпорындардың жөндеу және инвестициялық бағдарламалары талқыланды. Биыл 20 шақырым жылу желісін қайта жаңғырту, 379 шақырым электр желісін жаңғырту, сондай-ақ 60 шақырымнан астам су құбыры мен кәріз желілерін жаңарту жоспарланып отыр.
Кеңес қорытындысы бойынша қала әкімі жылыту маусымына дайындық жұмыстарын жеделдетуді және тұрғын үйлер мен әлеуметтік нысандардың қысқы кезеңге дер кезінде әрі толық дайын болуын қамтамасыз етуді тапсырды.