Атырауда түнгі рейд барысында 30 жасөспірім анықталды, — деп хабарлайды kazlenta.kz тілшісі Polisia.kz сайтына сілтеме жасап.
Жасөспірімдер арасындағы құқық бұзушылықтардың алдын алуда ата-ананың бақылауы мен тәрбиесінің маңызы ерекше. Әсіресе жазғы демалыс кезеңінде бос уақыт көбейгендіктен, балалардың қараусыз қалуы түрлі келеңсіз жағдайларға әкелуі мүмкін. Осыған байланысты полиция қызметкерлері жасөспірімдердің қауіпсіздігін қамтамасыз ету бағытындағы профилактикалық жұмыстарды тәулік бойы күшейтуде. Атырау облысы полиция департаменті “Тәуелсіз өмір” жастар қозғалысы және есірткі құқық бұзушылықтарының алдын алу жөніндегі кеңес мүшесі әрі блогер Андрей Котовпен бірлесіп түнгі профилактикалық рейд ұйымдастырды.
Іс-шара барысында тәртіп сақшылары сағат 22:00-ден кейін өздеріне бекітілген аумақтар бойынша топтарға бөлініп, Атырау қаласындағы Жастар саябағы мен басқа да қоғамдық орындарды аралады. Полицейлердің айтуынша, мұндай рейдтердің негізгі мақсаты – кәмелетке толмағандардың қауіпсіздігін қамтамасыз ету, олардың түнгі уақытта заңсыз немесе қауіпті ортада жүруінің алдын алу. Рейд нәтижесінде бір тәулік ішінде түнгі мезгілде заңды өкілдерінің қарауынсыз көшеде жүрген 30 кәмелетке толмаған жасөспірім анықталды. Олардың ата-аналары мен заңды өкілдері әкімшілік жауапкершілікке тартылды. Жаз мезгілі басталған тұста ювеналдық полиция қызметкерлері ата-аналарға балалардың жүріс-тұрысы мен бос уақытын жіті бақылауда ұстаудың маңызын ескертеді. Себебі жыныстық қолсұғушылық, төбелес, бұзақылық, буллинг және басқа да құқық бұзушылықтарға түрткі болатын жағдайлар көбіне түнгі уақытта орын алады. Жас ұрпақтың қауіпсіздігі мен тәртібіне бейжай қарамайтын тәртіп сақшылары мұндай профилактикалық іс-шараларды алдағы уақытта да тұрақты түрде жалғастыра бермек.