Бүгінгі референдумға қатысып, өз таңдауын білдіруге құқылы 446 391 батысқазақстандықтың 2254-і дауыс беру кезінде ерекше жағдайды қажет ететін мүгедектігі бар жандар. Бұл санаттағы дауыс берушілер үшін облыстық референдум комиссиясы тарапынан барынша қолайлы жағдай жасалған. Орал қаласы мен аудандарда такси қызметі ұйымдастырылып, учаскелерде арнайы орындар жабдықталған, деп хабарлайды kazlenta.kz тілшісі БҚО әкімдігіне сілтеме жасап.
Тағдыр тауқыметімен мүгедектер арбасына таңылса да, сағы сынбаған, келешекке сенімін жоғалтпаған жандардың бірі — Гүлмира Батпақұлова. Ол «Арба» бірлестігін құрып, мүгедектігі бар жандарға қолдау көрсетіп жүр. Оның айтуынша, бүгінгі референдумға елдің ертеңіне қатысты өз ұстанымын білдіру үшін келген.
— Бүгін №34 учаскеге өз дауысымды беруге келіп отырмын. Бұл жерде мүгедектігі бар жандарға өте ыңғайлы жағдай жасалған. Көзі нашар көретіндерге тактильді плиткалар мен бағыттаушы белгілер қарастырылған. Сондай-ақ қоларбамен жүретін және тірек-қимыл аппараты бұзылған адамдарға да барлық жағдай жасалған, — дейді ол.
Облыста дауыс беру кезінде ерекше жағдайды қажет ететін 2254 адам бар. Солар үшін бүгін тегін такси қызметі ұйымдастырылған. Жалпы өңір бойынша мүгедектігі бар жандарды тасымалдауға 78 автокөлік тартылған.