Оралдағы Жәңгір хан атындағы Батыс Қазақстан аграрлық университетінде «QURMET» челленджі аясында жастарды жат қылықтардан сақтандыруға бағытталған кездесу өтті, деп хабарлайды kazlenta.kz тілшісі БҚО баспасөз қызметіне сілтеме жасап.
Іс-шараға БҚО Полиция департаменті Қоғамдық қауіпсіздік басқармасының бастығы, полиция подполковнигі Олжас Ыбырайымов бастаған полиция қызметкерлері, сондай-ақ облыстық қоғамдық даму басқармасы басшысының орынбасары Гүлжанар Шукеева қатысты.
Полиция подполковнигі Олжас Ыбырайымов қазіргі таңда қоғам үшін аса өзекті екі мәселені атап өтті.
– Біріншісі – сталкинг, яғни адамның артынан қалмай қудалау. Екіншісі – некеге мәжбүрлеу. Бұл әрекеттер адамның жеке еркіндігіне, ар-намысына тікелей қауіп төндіреді. Жақын арада құқық бұзушылықтардың алдын алуға бағытталған жаңа заң күшіне енеді. Полиция құрылымдарына түскен әрбір арыз тіркеліп, міндетті түрде тексеріледі. Жаңа заң аясында профилактикалық бақылау күшейтіліп, қауіп тобына жататын адамдармен жеке жұмыс жүргізіледі. Біздің облыста сталкинг пен некеге мәжбүрлеу деректері бойынша екі адам қылмыстық жауапкершілікке тартылды. Соның бірі – жәбірленушінің бұрынғы жұбайы. Заңды түрде ажырасқанымен, бұрынғы күйеуі әйелін аңдып, қудалап, еркіндігін шектеген. Бұл – сталкинг белгілері. Сондықтан қылмыстық жауапкершілікке тартылды, – деді ол.
Ал облыстық қоғамдық даму басқармасы басшысының орынбасары Гүлжанар Шукеева батыс өңірінде алып қашу деректерінің сирек кездесетінін атап өтті.
– Басты мақсат – қоғамда кездесетін келеңсіздіктердің алдын алу. Ең бастысы отбасы құндылықтарына ерекше мән беруіміз қажет. Өйткені отбасында тұрақтылық болса, мемлекетте де тұрақтылық болады. Науқан аясында «QURMET» челленджі жарияланды. Қатысушылар әлеуметтік желілерде фото, бейне және қысқа мәтіндер жариялау арқылы құрмет пен жеке шекара ұғымы жөніндегі өз пікірлерін білдіре алады, – деді ол.