ҚР ІІМ Ұлттық ұланның №5573 әскери бөлімінде Астана қаласы полиция департаментінің кешенді күштерінің жалпы гарнизондық сапқа тұрғызу жиыны өтті, – деп хабарлайды kazlenta.kz тілшісі Polisia.kz сайтына сілтеме жасап.
Іс-шараға Астана қаласы полиция департаментінің бастығы Марат Төлебаев қатысты. Бұл сапқа тұрғызу рәсімі азаматтардың қауіпсіздігін қамтамасыз ету және қоғамдық тәртіпті сақтау бойынша кешенді шаралар аясында ұйымдастырылды. Осыған байланысты құқық бұзушылықтардың алдын алуға, жедел әрекет етуге және қоғамдық орындарда полицияның бақылауын күшейтуге ерекше назар аударылды.
Сонымен қатар "Заңсыз келуші", "Мал ұрлығы", "Дәрмек", "Stop-трафик" сияқты жедел алдын алу іс-шараларына ерекше көңіл бөлінді. Бұдан бөлек, мопедтерді пайдалану ережелерінің өзгеруіне байланысты азаматтарға көлік құралдарын алдын ала тіркеу және әкімшілік құқық бұзушылықтарға жол бермеу үшін жүргізуші куәлігін алу қажеттігі ескертілді.