Алматы облысында синтетикалық есірткі өндіретін зертхана әшкереленді, - деп хабарлайды kazlenta.kz тілшісі Polisia.kz сайтына сілтеме жасап.
Алматы облысы полиция департаментінің есірткі қылмысына қарсы іс-қимыл басқармасының қызметкерлері ҚР ІІМ есірткі қылмысына қарсы іс-қимыл комитетінің үйлестіруімен, сондай-ақ Қарасай аудандық полиция басқармасы мен прокуратура органдарының қолдауымен синтетикалық есірткі өндіретін есірткі зертханасын жойды. Жедел-іздестіру іс-шаралары барысында екі күдікті анықталып, ұсталды. Негізгі күдікті қазіргі уақытта қамауға алынды. Тінту барысында мефедрон синтетикалық есірткісі, оны дайындауға арналған жабдықтар мен шыны ыдыстар, прекурсорлар және түрлі химиялық заттар табылып, тәркіленді.
Осылайша, құқық қорғау органдары қауіпті психоактивті заттардың таралуына жол бермей, көптеген азаматтардың денсаулығы мен өмірін сақтап қалды. Айта кету керек, синтетикалық есірткі дайындау барысында адам өмірі мен денсаулығына аса қауіпті, улы химиялық компоненттер қолданылады. Қазіргі уақытта аталған дерек бойынша сотқа дейінгі тергеп-тексеру жүргізілуде. Өзге ақпарат ҚР ҚПК-нің 201-бабына сәйкес жария етуге жатпайды.