Павлодар облысында жылдамдық режимін бұзған жүргізушілер жауапқа тартылды, – деп хабарлайды kazlenta.kz тілшісі Polisia.kz сайтына сілтеме жасап.
Жылдамдықты асыру – жол қозғалысы кезінде жиі кездесетін құқық бұзушылықтардың бірі. Қабылданып жатқан барлық шараларға қарамастан, тәртіп бұзушылардың саны азаймай отыр.
— Мәселен Павлодар – Астана автожолында BMW X6 автокөлігінің жүргізушісі рұқсат етілген жылдамдық 140 км/сағ болғанына қарамастан, 171 км/сағ жылдамдықпен қозғалған. Құқық бұзушыға қатысты тиісті шаралар қабылданды, — деп мәлімдеді Павлодар облысы полиция департаменті әкімшілік полиция басқармасының бастығы Бакибай Ахмедьянов.
Айта кетейік, жыл басынан бері полиция қызметкерлері жылдамдық режимін бұзудың 15 176 дерегін анықтады. Қозғалыс жылдамдығы жүргізуші немесе жолаушының асығыстығына байланысты болмауы тиіс, себебі кез келген асығыстық жылдамдықтың артуына әкеліп, жол қозғалысына қауіп төндіреді. "Заң мен тәртіп" қағидаты әрбір заңға бағынатын азаматтың мінез-құлқының нормасына айналуы тиіс. Жылдамдық режимін сақтап, кенет маневрлер жасамаңыз.