Маңғыстау облысында полицейлер көлікті заңсыз айдап әкетудің алдын алуда, – деп хабарлайды kazlenta.kz тілшісі Polisia.kz сайтына сілтеме жасап.
20-21 қаңтар аралығында Маңғыстау облысы көлемінде "Айдап әкетуді тоқтату" жедел-профилактикалық іс-шарасы жүргізілуде. Бұл шараның негізгі мақсаты – көлікті айдап әкетудің және ұрлаудың алдын алу, сондай-ақ, осы қылмыстарға қатысы бар күдікті тұлғаларды анықтап, ұстап, тиісті шараларды қабылдау. Көлікті айдап әкету және ұрлау көбінесе автокөліктерге бақылаудың әлсіреуі немесе тұрғындардың сақтық шараларын сақтамауы салдарынан орын алады.
Қауіпсіздікті қамтамасыз ету үшін келесі ережелерді сақтау қажет. Қысқа уақытқа шыққанда да есік, терезе және жүк салғышты міндетті түрде жабу керек. Сенімді дабыл жүйесін орнату абзал. Көлікті жарық жерге, адамдар көп жүретін орынға немесе күзетілетін тұраққа қойыңыз. Сөмке, ұялы телефон және басқа да құнды заттарды көлік салоны ішінде көзге көрінетін жерде қалдырмаңыз. Полиция қабылдап жатқан шаралардың басты мақсаты – өңірдегі қоғамдық қауіпсіздікті қамтамасыз ету және қылмыс деңгейін төмендету. Бұл бағыттағы жұмыстың негізгі қағидаты – "Заң мен тәртіп", яғни қоғамдық қауіпсіздікті қамтамасыз етуге бағытталған билік пен халықтың бірлескен жауапкершілігі. Полиция егер күмәнді жағдай байқалса немесе ақпарат қажет болса, дереу "102" нөміріне хабарласып, оқиға туралы мәлімет беру керегін ескертеді. Құқық бұзушылықтың алдын алу – полиция мен тұрғындардың ортақ әрекетінің нәтижесі.