СҚО-да интернет-алаяқтық фактісі бойынша тергеу жүріп жатыр, – деп хабарлайды kazlenta.kz тілшісі Polisia.kz сайтына сілтеме жасап.
Солтүстік Қазақстан облысының бір ауданында полицейлер жергілікті тұрғынның арызын қабылдады. Ол инвестиция арқылы жоғары табыс табу уәделеріне сенген. Арызданушы Instagram әлеуметтік желісінен ірі қазақстандық компаниялардың бірінің мемлекеттік бағдарлама аясында ресми төлемдер арқылы табыс табу жөніндегі жарнамасын көргенін айтқан. Ауыл тұрғыны сілтеме арқылы WhatsApp мессенджеріндегі диалогқа өткен. Онда бағдарламаға қатысу үшін инвестициялық салымдар жасау қажеттігі хабарланған. Ер адам несие рәсімдеп, ақшаны көрсетілген банк карталарының нөмірлеріне бөліп аударған. Осыдан кейін "менеджерлермен" байланыс үзілген, сол сәтте ол алаяқтардың құрбаны болғанын түсінген.
Тәртіп сақшылары интернеттегі жылдам табыс уәделеріне сенбеуге шақырады. Тіпті жарнама танымал тұлғалардың қатысуымен түсірілген бейнероликтермен сүйемелденсе де, сақ болу қажет. Мұндай видеоларды алаяқтар жасанды интеллект көмегімен жасап шығарады. Инвестиция арқылы табыс табу үшін тек беделі жоғары, ресми ресурстарды пайдалану қажет. Алаяқтар ресми сайттарға өте ұқсас жалған интернет-парақшалар жасай алатынын естен шығармаңыз. Сондықтан әлеуметтік желілердегі хабарландырулар мен мессенджерлердегі күмәнді сілтемелер арқылы өтпеу аса маңызды.