Түркістан облысында полиция сертификатталмаған 800-ге жуық пиротехниканы тәркіледі, – деп хабарлайды kazlenta.kz тілшісі Polisia.kz сайтына сілтеме жасап.
Мереке күндері қоғамдық қауіпсіздікті қамтамасыз ету, өрттердің алдын алу және азаматтардың жарақаттануына жол бермеу мақсатында Түркістан облысы аумағында "Пиротехника" жедел-профилактикалық іс-шарасы өткізілуде. Іс-шара аясында полиция қызметкерлері сауда нүктелері мен базарларда 160-тан астам рейдтік іс-шара ұйымдастырды. Рейд барысында пиротехникалық өнімдерді сақтау, сату және тасымалдау кезінде заңнама талаптарының сақталуы тексеріліп, сертификатталмаған және заңсыз айналымдағы пиротехникалық бұйымдарды анықтау жұмыстары жүргізілді. Нәтижесінде тауарлармен немесе өзге де заттармен заңсыз сауда жасаған 90 жайт анықталды.
Құқық бұзушылардан 797 дана сәйкестік сертификаты жоқ пиротехникалық бұйымдар тәркіленіп, тиісті шара қабылданды. Полиция барша азаматқа сертификатталмаған пиротехникалық заңсыз өнімдерді пайдаланбауды ескертеді. Отшашуларды қауіпсіз қолдану үшін нұсқаулық талаптарын қатаң сақтау маңызды. Ең бастысы пиротехниканы балалардың пайдалануына қатаң тыйым салынады.