Түркістан облысында пиротехникалық өнімді заңсыз сатудың 170-тен астам фактісі анықталды, – деп хабарлайды kazlenta.kz тілшісі Polisia.kz сайтына сілтеме жасап.
Жаңа жылдық мерекелер қарсаңында жедел-профилактикалық іс-шара шеңберінде полиция мен төтенше жағдайлар қызметкерлері бірлесіп 30-ға жуық рейдтік тексерулер жүргізді.
Нәтижесінде пиротехникалық өнімді заңсыз сатудың 170-тен астам фактісін анықтады. Ал сатушылардан 728 дана сертификатталмаған пиротехника тәркіленіп, құқық бұзушыларға қатысты 7,5 миллион теңгеден астам сомаға айыппұл салынды.
Сондай-ақ полицейлер пиротехникалық бұйымдарды пайдалану кезінде жарақаттанудың алдын алуға ерекше көңіл бөлуде. Өйткені отшашуларды дұрыс қолданбаудың салдары ауыр зардаптарға әкелуі мүмкін.
Іс-шара барысында тәртіп сақшылары сертификатталмаған пиротехниканы сату мен сауда нүктелерін тексеріп қана қоймай, сатып алу мен пайдалану кезіндегі қауіпсіздік ережелерін сақтау қажеттілігі туралы халықпен түсіндірме әңгімелер жүргізуде.
Өз кезегінде полиция азаматтарды қауіпсіздік ережелерін ұстануға, соның ішінде пиротехниканы жабық үй-жайлар мен адамдар көп шоғырланған жерлерде пайдаланбауға кеңес береді. Пиротехникалық өнімдердің өзі ұсынылған стандарттарға толық сәйкес келуі керек.
Естеріңізге сала кетейік, «Пиротехника» жедел-профилактикалық іс-шарасы сертификатталмаған пиротехникалық бұйымдарды заңсыз дайындау, сату фактілерінің алдын алу мен анықтау мақсатында өткізілуде. Бұл бағыттағы жұмыс алдағы уақытта да жалғасатын болады.