Алматы облысында есірткінің заңсыз айналымына қатысты бірқатар факті анықталды, – деп хабарлайды kazlenta.kz тілшісі Polisia.kz сайтына сілтеме жасап.
24 желтоқсанда Алматы облысы полиция департаментінің есірткі қылмысына қарсы іс-қимыл басқармасының қызметкерлері ҚР ІІМ криминалдық полиция департаментімен бірлесіп, арнайы бөлімшенің күштік қолдауымен және кинологиялық қызмет орталығын тарта отырып, Алматы облысының аумағында жедел іздестіру іс-шараларының кешенін өткізді. Операция барысында жедел қызығушылық тудырған бірнеше мекенжай бір мезгілде тексерілді.
Іле ауданының Байсерке және Али ауылдарында санкцияланған тінту барысында ерекше иісі бар өсімдік тектес заттар, болжам бойынша марихуана, сондай-ақ кептірілген, болжам бойынша қарасора өсімдіктері анықталып, тәркіленді. Талғар ауданының Жалкамыс, Бесағаш және Жаңалық елді мекендерінде өсімдік тектес есірткі заттары, сондай-ақ есірткі заттарын өсіруге және пайдалануға арналған деп болжанатын құрал-жабдықтар мен заттар анықталып, тәркіленді.
Кейбір тәркіленген заттар бойынша оларды сақтау заңдылығына қатысты тексеру жүргізілуде. Сонымен қатар Жамбыл ауданының Мыңбаев ауылында тұрғын үйді тінту барысында ерекше иісі бар өсімдік тектес ұнтақ тәрізді зат тәркіленді. Аталған барлық фактілер бойынша қолданыстағы заңнама талаптарына сәйкес сотқа дейінгі тергеп-тексеру және өзге де процессуалдық тексеру шаралары жүргізілуде. Полиция есірткі заттарының заңсыз айналымына қарсы жүйелі жұмысты жалғастырып, азаматтарды осындай қылмыстарды анықтауға ықпал ететін ақпаратты құқық қорғау органдарына хабарлауға шақырады.