Қарағандыда полицейлер 13 жолаушыға көмектесті, – деп хабарлайды kazlenta.kz тілшісі Polisia.kz сайтына сілтеме жасап.
Қарағанды өңірін шарпыған сақылдаған сары аязда Астана – Қарағанды – Алматы бағытымен Шымкентке бет алған жолаушылар автобусы жол үстінде тосын жағдайға тап болды. Трассаның 530-шақырымында, Қарағанды облысы полиция департаментінің патрульдік полиция батальоны қызмет көрсететін аумақта тәртіп сақшылары қақаған аяздан қозғалыссыз қалған автобусты байқады. Қатты суықтың салдарынан дизель отыны қатып, көлік әрі қарай жүре алмай қалған.
Салонда үш бала бар, барлығы 13 жолаушы отырған. Жағдайды дереу бағамдаған полиция қызметкерлері уақыт оздырмай әрекет етті. Тоңып қалған азаматтар қауіпсіз жерге көшіріліп, олар жолай өтіп бара жатқан, оңтүстік астанаға бет алған басқа автобусқа отырғызылды. Уақтылы әрі кәсіби көрсетілген көмектің арқасында жолаушылар сапарын жылы ортада, аман-есен жалғастырды. Полиция кез келген ауа райында азаматтардың өмірі мен қауіпсіздігін бірінші орынға қоя отырып, жедел әрі жауапты қызмет етуге әрдайым дайын.