Алматы әкімдігі қала құрылысы кеңесінің мүшелерімен бірлесіп, Мәжіліс депутаттарына 2040 жылға дейінгі қала Бас жоспарын түзету жобасын таныстырды. Талқылауға депутаттар Ерлан Стамбеков, Бақытжан Базарбек және Ирина Смирнова қатысты, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Қаланы дамыту полицентрлік модель негізінде жүзеге асырылмақ. Бұл жаңа іскерлік белсенділік орталықтарын, жұмыс орындарын, қоғамдық кеңістіктер мен инфрақұрылымды қалыптастырады.Депутаттар халық санының өсуі, құрылыс қарқыны және экологиялық жүктеменің артуын ескере отырып, Бас жоспарды түзетудің уақытылы екенін атап өтті. Талқылау барысында сейсмикалық қауіпсіздік, әлеуметтік инфрақұрылыммен қамтамасыз ету және кешенді құрылыс мәселелеріне, сондай-ақ ауа сапасын жақсарту мен өндірістік кәсіпорындарды қала аумағынан тыс жерге көшіруге ерекше назар аударылды. Негізгі басым бағыттардың қатарында қоғамдық көлікті, оның ішінде метроны, LRT және BRT желілерін дамыту, жасыл аймақтарды кеңейту және ауа сапасын жақсарту мәселелері бар, - делінген хабарламада.