Алматының жергілікті бюджетінің кірісі 2026 жылы 2,5 трлн теңге көлемінде жоспарланған, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Бұл туралы мәслихат сессиясында әкім Дархан Сатыбалды мәлімдеді. Оның айтуынша, экономиканың өсуі түсімдердің тұрақты артуын қамтамасыз етіп, бюджет негізінен өз кірістері есебінен қалыптасады. Алматы республикалық қазынаға түсетін қаржының бестен бір бөлігін қамтамасыз ететін негізгі донор қалалардың бірі мәртебесін сақтап отыр. Сонымен бірге, алымдардың көлемі 2025 жылы 250 млрд теңгеден 2026 жылы 491 млрд теңгеге дейін екі есеге жуық өседі.
Жалпы, үш жыл ішінде республикалық бюджетке шамамен 1,8 трлн теңге аударылады.2026 жылы қала бюджетінің шығысы 2,8 трлн теңге көлемінде қарастырылған, оның үштен бірі экономикалық өсімді ынталандыруға бағытталады. Әкімнің айтуынша, қазіргі шығыс оңтайландырылған. Бұл дамуға арналған бюджет көлемін ұлғайтуға және ірі инвестициялық жобаларды жүзеге асыруды бастауға мүмкіндік берді.