Астанада тәртіп сақшылары ауа райының қолайсыздығына қарамастан қызметін атқаруда, – деп хабарлайды kazlenta.kz тілшісі Polisia.kz сайтына сілтеме жасап.
Астанада боран, көктайғақ және қатты жел секілді қолайсыз ауа райына байланысты полиция департаменті күшейтілген қызмет тәртібіне көшті. Қиындықтарға қарамастан, тәртіп сақшылары қоғамдық қауіпсіздікті қамтамасыз ету, жол-көлік оқиғаларының алдын алу және азаматтарға жедел көмек көрсету бағытындағы жұмыстарын тоқтаусыз жүргізуде. Қала аумағында патрульдік жасақтар саны арттырылып, жол-патрульдік полиция жасақтары тәулік бойы күшейтілген бақылау ұйымдастыруда. Полицейлер көктайғақ жолдарда қозғалысты реттеп, қатты жел салдарынан қозғалысы қиындаған көлік құралдарына көмек көрсетуде.
Тұрғын үйлер мен әлеуметтік нысандар маңында да құқық бұзушылықтардың алдын алу бағытындағы рейдтік іс-шаралар жалғасуда. Сондай-ақ төтенше жағдайда қалып қойған азаматтарға да көмек көрсетіп жатыр. Қарлы боран кезінде жолда қалған жүргізушілер, бағытынан жаңылған жаяу жүргіншілер мен жедел көмекке мұқтаж адамдарға дер кезінде жәрдем берілуде. Сонымен қатар полиция департаменті қала әкімдігі мен коммуналдық қызметтермен тығыз өзара іс-қимыл жасап, жолдардың тазалануы мен қоғамдық тәртіптің сақталуын үйлестіруде. Полиция тұрғындарды ауа райының өзгерістеріне мұқият болуға, дауылдық ескертулерді орындауға, мүмкіндігінше жеке көлікпен жолға шықпауға және тәртіп сақшыларының нұсқауларын қатаң сақтауға шақырады.