Қарағанды облысында Саран – Шахтинск автожолының 19 шақырымдық бөлігінде күрделі жөндеу жұмыстары жалғасуда. Бүгінгі таңда 12 шақырымға үш қабат асфальт төселіп, қалған бөлігі келесі жылы аяқталмақ, деп хабарлайды kazlenta.kz тілшісі Қарағанды облысы әкімінің баспасөз қызметіне сілтеме жасап.
Аталған жолда ауыр жүк көліктерінің рұқсат етілген осьтік жүктемеден артық тасымалға жол бермеу мақсатында қозғалыс кезінде автоматты түрде өлшейтін жүйе орнатылды.
— Жүйе деректері бойынша, бұл бағытпен тәулігіне 150-ден астам жүк көлігі өтеді, оның шамамен 20-сы рұқсат етілген нормадан артық жүктемемен жүреді. Бұл бағыттағы жұмыстар жалғасады. Келер жылы осындай тағы сегіз кешен орнату жоспарланып отыр: жетеуі — республикалық, біреуі — облыстық маңыздағы жолдарда, — деді облыстық жолаушылар көлігі және автомобиль жолдары басқармасының басшысы Мақсат Мұқашев облыс әкімдігінде өткен аппараттық жиында.
Саран – Шахтинск бағытындағы жолда Шерубай-Нұра өзенінің үстінен өтетін көпірді қайта жаңарту жұмыстары жүріп жатыр. Сондай-ақ Осакаровка – Есіл трассасындағы Есіл өзеніндегі көпірдің жағалау тіректері орнатылып, аралық тіректері жөнделуде.
Ал Теміртау – Ғабиден Мұстафин ауылы бағытындағы жолда Нұра өзенінен өтетін көпірді реконструкциялау бойынша негізгі жұмыстар толық аяқталды.
Шахан – Жаңаталап арасындағы бес шақырымдық жолды қайта жаңарту басталды. Екі шақырымында жолдың негізі жаңартылып, үш қабат асфальт төселді. Қалған жұмыстар келесі жылы жалғасады.
Биыл өңірде жалпы ұзындығы 637 шақырым автожол жаңартылды. Облыстық маңыздағы үш ірі жоба толық аяқталды: Нұра – Осакаровка бағытындағы 20 шақырым (Осакаровкадан Қоянды ауылына бұрылысына дейін), Жартас – Долинка бағытындағы 21 шақырым және Үштөбе – Құрылыс арасындағы 9 шақырым жол. Реконструкция барысында жол жамылғысының іргетасы нығайтылып, қозғалыс қауіпсіздігі деңгейі арттырылды.
Орташа жөндеу жұмыстары облыстық маңыздағы алты учаскеде, жалпы 60 шақырым жолда жүргізілді. Оның ішінде Керней – Семізбұға, Қарағанды – Доскей, Осакаровка – Жастар және Нұра – Шахтерское бағыттары бар.
Қазір екі жылдық жобалар аясында Сәкен Сейфуллин – Ақсу-Аюлы бағытындағы 26 шақырым жолда және Қарағанды – Жезқазған трассасынан Шахтинск қаласына дейінгі 24 шақырымдық учаскеде жұмыстар жалғасып жатыр. Бір бөлігі орындалып, қалғаны келесі жылы аяқталады. Барлық учаскеде екі қабат асфальт төселіп, бұл жолдың ұзақ мерзімге шыдамдылығын арттырады және ауыр көлік қозғалысына төтеп беруге мүмкіндік береді.
Ауылдық жерлерде «Ауыл – Ел бесігі» жобасы аясында 21 елді мекенде жалпы ұзындығы 84 шақырым ауылішілік жолдар жөнделді.
Республикалық маңыздағы Қарағанды – Балқаш автожолының реконструкциясы толық аяқталып, пайдалануға берілді. Қазіргі уақытта абаттандыру, көгалдандыру және инженерлік желілер тарту жұмыстары жүргізілуде. 20 жарық аркасына LED-экрандар мен 10 жол белгісі орнатылды. Автоматтандырылған өлшеу және қозғалысты бақылау жүйелерін орнату аяқталуға жақын. Сонымен қатар 18 демалыс аймағы салынып, төрт санитарлық-гигиеналық нысан пайдалануға берілді.
Биыл республикалық маңыздағы 245 шақырым жол орташа жөндеуден өтті. Барлық жұмыстар толық көлемде аяқталды.
— Бұдан бөлек, Қарағанды – Шахтинск автожолындағы Шерубай-Нұра өзені үстінен өтетін көпірді қайта салуға арналған жобалық құжат дайындалып, қазіргі уақытта мемлекеттік сараптамадан өтуде.
2026 жылы республикалық маңыздағы алты жол учаскесіне орташа жөндеу жүргізу және Ақшатау – Ағадыр – Ортау бағытындағы 95 шақырым жолды күрделі жөндеуден өткізу жоспарланып отыр.
— Жол құрылысы сапасын және пайдаланылатын материалдардың сәйкестігін Ұлттық жол активтері сапасы орталығымен бірлесе сараптап, теріс қорытынды болған жағдайда нысандарды пайдалануға қабылдауға жол бермеу қажет, — деп атап өтті облыс әкімі Ермағанбет Бөлекпаев.