Ішкі істер министрінің орынбасары – Қылмыстық-атқару жүйесі комитетінің (ҚАЖК) төрағасы Абай Қайырбеков бұрынғы ұлттық экономика министрі Қуандық Бишімбаев жазасын қалай өтеп жатқанын айтты, - деп хабарлайды kazlenta.kz тілшісі Tengrinews.kz сайтына сілтеме жасап.
Абай Қайырбековтің айтуынша, Бишімбаев қазір түзеу мекемесінде "басқа сотталғандармен тең жағдайда" жазасын өтеп жатыр.
"Бишімбаев қылмыстық-атқару заңнамасының барлық талабына сәйкес, басқа сотталғандармен бірдей және тең жағдайда жазасын өтеп жатыр", — деді ҚАЖК басшысы.
Бишімбаевтың жұмысқа орналасуы және еңбекақысы туралы сұраққа министрдің орынбасары бұл ақпараттың жеке деректерге жататынын атап өтті.
Сондай-ақ журналистер экс-министрдің жеке камерада отырған-отырмағанын сұрады."Жаңа айтқанымдай, ол жалпы негізде, басқа сотталғандармен бірге жазасын өтеп жатыр. Бұл сотталғанға қандай да бір ерекше жағдай, жеңілдік немесе талаптар қарастырылмаған", — деді Қайырбеков.
Еске сала кетейік, былтыр 13 мамырда Астанада Салтанат Нүкенованың өліміне қатысты ісі бойынша сот процесі аяқталды. Ұлттық экономика министрі қызметін атқарған Қуандық Бишімбаев 24 жылға бас бостандығынан айырылған болатын.