Қала күніне орай Алматы зообағы көпбалалы және әлеуметтік жағдайы төмен отбасыларға, ерекше қажеттілігі бар балаларға, сондай-ақ мектеп-интернаттар мен оңалту орталықтарының тәрбиеленушілеріне тегін экскурсия ұйымдастырды. Бірнеше күн ішінде мыңнан астам оқушы бағдарламаға қатысты, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Әсіресе, шолу бағыттарына қызығушылық жоғары. Сонымен бірге келушілерге «Қызыл кітап беттерінен» және «Нептунның су асты әлемі» атты тақырыптық экскурсиялар да ұсынылды. Зообаққа 6 жасқа дейінгі балалар, ерекше қажеттілігі бар азаматтар, жасы бойынша зейнеткерлер, мерзімді әскери қызметшілер және 15 жасқа дейінгі балалары бар көпбалалы аналар әрдайым тегін кіре алады. Ол үшін тиісті құжатты көрсетіп, кассадан «нөлдік» билет алу жеткілікті, - делінген хабарда.