16 қыркүйек күні Алматы әуежайында әйелдер арасындағы Қазақстан құрамасын жанкүйер қауым салтанатты түрде қарсы алды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Ливерпульде өткен әлем чемпионатында былғары қолғап шеберлеріміз үш алтын, бір күміс және екі қола медаль жеңіп алды. Қазақстан құрамасы жалпыкомандалық есепте бірінші орынға шықты! Алматы қаласы Спорт басқармасының басшысы Дархан Нұрханұлы чемпиондарды — Алуа Балқыбекованы, Аида Әбікееваны, Назым Қызайбайды, Елдана Тәліпованы және Виктория Графееваны құттықтап, әлемдік аренада елдің мерейін асқақтатқаны үшін алғыс айтты. Спортшыларымыздың тарихи жеңісі әрбір қазақстандықтың жүрегінде мақтаныш сезімін оятты.