Биылғы шомылу маусымы кезеңінде Астана қаласы Төтенше жағдайлар департаменті су айдындарындағы халықтың қауіпсіздігін қамтамасыз ету мақсатында профилактикалық іс-шаралар кешенін іске асырды. Бұл туралы елорданың Коммуникациялар қызметінде өткен брифингте Астана қаласының Төтенше жағдайлар департаменті бастығының орынбасары Әрлен Бүркітбай мәлім етті, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Спикердің айтуынша, қауіпсіздік шараларына күн сайын 80 маман, 9 жүзу құралы және 5 техника бірлігі жұмылдырылған. Қаланың су айдындарында 3 стационарлық бекет пен 16 патруль ұйымдастырылып, олардың жұмысы судағы жағдайды тәулік бойы бақылауға мүмкіндік берген. Жаяу патрульдер күн сайын таңғы 9:00-ден кешкі 21:00-ге дейін қызмет атқарса, Есіл өзенінің бойындағы катерлер тәулік бойы кезекшілікте болған.Қосымша қауіпсіздікті қамтамасыз етуге Мартбек Мамраев атындағы 52859 әскери бөлімінің әскери қызметшілері де тартылған. Жазғы маусым аяқталғаннан кейін жаяу патрульдер өз жұмысын тоқтатқан, алайда катерлер мен мобильді бекеттер күзет қызметін жалғастыруда. Катерлер тәулік бойы, мобильді бекеттер күн сайын 09:00-ден 21:00-ге дейін жұмыс істейді.
Рейдтік іс-шаралар барысында полиция қызметкерлерімен бірлесіп 176 әкімшілік құқықбұзушылық фактісі анықталды. Атап айтқанда: 84 хаттама - ӘҚБтК-нің 364-бабы бойынша (ортақ су пайдалану тәртібін бұзу); 68 хаттама - 440-бап бойынша (қоғамдық орындарда алкогольдік ішімдіктер ішу); 21 хаттама - 412-бап бойынша (тыйым салынған аумақтарда шомылу).Аталған құқықбұзушылықтар үшін жалпы сомасы 578 004 теңге көлемінде айыппұл салынған. Құтқарушылар мен әскери қызметшілердің бірлескен жұмысының нәтижесінде 13 адам құтқарылған.