Павлодар облысында «Назар аударыңыз – балалар!» акциясы аясында мектеп автобустарына кешенді тексеріс жүргізілді, деп хабарлайды kazlenta.kz тілшісі Polisia.kz сайтына сілтеме жасап.
Тереңкөл аудандық полиция бөлімінің қызметкерлері кәмелетке толмағандарды тасымалдайтын көліктерді бақылаудан өткізіп, олардың техникалық жағдайын, қауіпсіздік құралдарының толық болуын және алғашқы медициналық көмек көрсетуге арналған жабдықтардың бар-жоғын қадағалады. Сондай-ақ жол қозғалысы ережелерінің сақталуына да ерекше назар аударылды.
Оқушылардың мектепке бару және үйлеріне қайту жолындағы қауіпсіздігін қамтамасыз ету үшін ұйымдастырылған бұл шара барысында білім беру мекемелерінің маңындағы жол белгілері, жаяу жүргіншілер өткелдері мен қоршаулардың жағдайы да тексерілді.
Полиция қызметкерлері жүргізушілерді балалар мекемелері маңында барынша мұқият болуға, жол қозғалысы ережелерін қатаң сақтауға және балалардың қауіпсіздігін басты назарда ұстауға шақырады.