Алматы әкімі Дархан Сатыбалды жаңа оқу жылына дайындық мәселелері бойынша жиын өткізді. Конституция күні мен Білім күніне орай «Келешек мектептері» жобасы аясында қалада 12 мың орынға арналған 7 жаңа мектеп ашылады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Олар кең сыныптармен, заманауи зертханалармен, спорт және акт залдарымен жабдықталған. Балалардың жайлы оқуы мен жан-жақты дамуына барлық жағдай жасалған. Жаңа оқу жылында жоғары білікті педагогтар жұмысқа кіріседі. Мұғалімдердің жартысы enbek.kz порталы арқылы конкурстық іріктеуден өткен. Сонымен қатар, оқушыларды қауіпсіз әрі ыңғайлы тасымалдауды қамтамасыз ететін «Мектеп автобусы» жобасы жалғасуда. 1 қыркүйекте бірінші сынып оқушылары мен түлектер үшін салтанатты жиындар өтеді. Қалған сыныптар үшін 2 қыркүйекте Білім күніне арналған сынып сағаттары ұйымдастырылады.