Ақтөбеде локомотив депосының екі қызметкері өндірістегі жарылыс пен өрт салдарынан көз жұмды, - деп хабарлайды kazlenta.kz тілшісі Tengrinews.kz сайтына сілтеме жасап.
Қайғылы оқиға 26 маусымда Ақтөбе локомотив жөндеу депосының аумағында болған. Алайда бұл туралы ақпарат бүгін ғана жария болды. Жөндеу жұмыстары жүргізіліп жатқан цехта жарылыс болып, арты өртке ұласқан.
2000 және 1989 жылы туған екі жұмысшы күйіп қалып, Ақтөбе облыстық көпсалалы ауруханасының жансақтау бөліміне жеткізілген.
adidas.kzТолығырақ"Зардап шеккендерге толық көлемде қажетті медициналық көмек көрсетілді, бейінді мамандардың қатысуымен тәулік бойы бақылау ұйымдастырылды. Алайда жарақаттарының ауырлығына байланысты оларды құтқару мүмкін болмады", – деп хабарлады Ақтөбе облысының Денсаулық сақтау басқармасы.
Ақтөбе облысы бойынша Мемлекеттік еңбек инспекциясы комитеті департаментінің мәліметінше, зардап шеккендердің бірі есін жимастан 30 маусымда қаза болған. Екінші жұмысшы 1 шілдеде көз жұмған.
"Оқиғаны тергейтін арнайы комиссия құрылды. Екі жұмысшының қаза тапқаны расталғаннан кейін комиссия құрамына өзгерістер енгізіліп, комиссия төрағасы ретінде департамент басшысы тағайындалды", – деп нақтылады мемлекеттік орган.
Қаза тапқандардың бірінің артында бес кәмелетке толмаған баласы қалды. Олардың жұмыс істеген "Қамқор Локомотив" компаниясы марқұмдардың отбасыларына қолдау көрсетілгенін хабарлады.
Қайтыс болған азаматтардың атына тіркелген берешек бар-жоғын анықтау үшін екінші деңгейлі банктерге сұрау жіберілген. Оқиғаның нақты себептерін арнайы комиссия анықтап жатыр.