Көліктегі полиция департаментінің қызметкерлері қаза болған әріптестерін бір минут үнсіздікпен еске алды, — деп хабарлайды kazlenta.kz тілшісі Polisia.kz сайтына сілтеме жасап.
Көліктегі полиция департаментінің қызметкерлері қызметтік борышын өтеу кезінде қаза тапқан әріптестерінің жарқын бейнесіне тағзым етті. Қазақстан полициясы күні мен “Бейбіт күннің батырлары” акциясы аясында қаза тапқан қызметкерлерге арналған “Мәңгілік ұмытылмас есімдер” мемориалына гүл шоқтары қойылды. Департамент құрылған сәттен бастап 11 қызметкер қызметтік борышын өтеу барысында қаза тапты. Олардың ерлігі мен жанқиярлығы әріптестерінің және азаматтардың жадында мәңгі сақталады. Олар көрсеткен ерлік – нағыз патриотизмнің, Отанға деген сүйіспеншілік пен антқа адалдықтың жарқын үлгісі.
2011 жылы Департаменттің саптық алаңында орнатылған “Мәңгілік ұмытылмас есімдер” мемориалы құрмет пен естеліктің айнымас нышанына айналды. Дәстүр бойынша бұл қастерлі орынға гүл шоқтарын қою рәсімінсіз бірде-бір салтанатты шара өтпейді. Көлік полицейлері ұрпақтар сабақтастығын сақтап, қоғам қауіпсіздігі жолында жанын қиған ерлердің рухына тағзым етуді жалғастырып келеді.