Шығыс Қазақстанда жас отан қорғаушылардың жаңа буыны қалыптасуда, – деп хабарлайды kazlenta.kz тілшісі Polisia.kz сайтына сілтеме жасап.
Өскемен қаласындағы Б. Шаяхметов атындағы №23 орта мектебінде жас полицейлерден құралған «Жас сақшы» атты тоғызыншы кадет сыныбының ашылуы өтті. Бұл ерекше жоба жас ұрпақтың бойына патриоттық рухты дарытып, Отанға деген сүйіспеншілікті арттыру, қоғам игілігі үшін қызмет етуге ұмтылысын тәрбиелеу мақсатында қолға алынған. Сонымен бірге жастарды құқық қорғау органдарында және әскер қатарында адал қызмет етуге даярлауды көздейді.
Кадет сыныбына қызметтік борышын өтеу кезінде қаза тапқан полиция аға лейтенанты Ринат Исаевтың есімі берілді. Ол өз өмірін бейбіт тұрғындардың тыныштығы мен қауіпсіздігін қорғауға арнаған, ерлік пен адалдықтың жарқын үлгісін көрсеткен тұлға ретінде ел есінде мәңгі сақталады.
— Бүгін біз ерекше маңызды оқиғаның куәсі болып отырмыз. Ринат Исаевтың есімі адалдық пен Отанға деген сүйіспеншіліктің символы ретінде мәңгі есте қалады. Бұл сіздер үшін үлкен өнеге. Сіздердің батырларымыздың ерлік жолын жалғастыра алатын, адал әрі қайсар ұрпақ болып өсетініңізге сенемін, – деді Шығыс Қазақстан облысы полиция департаменті бастығының орынбасары Серік Манапов.
Салтанатты іс-шарада 23 оқушы еліміздің батыл әрі сенімді қорғаушысы болуға ант берді.
— Енді сіздер жай ғана оқушылар емес, жас полицейлерсіздер. Салтанатты түрде ант беріп, форма киіп, сіздер үлкен құрмет пен жауапкершілік жүктейтін қадам жасадыңыздар. Бұл сіздердің өмірлеріңізде маңызды белес болмақ. Қадамдарыңыз сәтті болып, жолдарыңыз ұзақ та даңқты болсын, – деді Өскемен қаласы ардагерлер кеңесінің төрайымы Зинаида Макарушина.
«Жас сақшы» кадет сыныбы жасөспірімдерге білім мен тәрбиені қатар сіңіретін, патриотизм, ерлік, елге қызмет ету құндылықтарын дәріптейтін ерекше алаңға айналады. Мұнда оқушылар елдің бейбіт өмірі мен тыныштығын сақтауға бағытталған арнайы дайындықтардан өтеді.
Бұл бастама жас ұрпақтың жүрегіне Отанға деген сүйіспеншілік ұялатып, қоғам игілігі үшін адал қызмет ететін болашақ батырларды тәрбиелеудің жарқын үлгісі болмақ.