Премьер-министрдің орынбасары Қанат Бозымбаев энергетика және коммуналдық секторларды жаңғырту жөніндегі Ұлттық жобаны іске асыруға арналған жобалық кеңсенің отырысын өткізді, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Отырыс барысында 2025 жылға арналған инвестициялық жоспар мен нарықтық қаржыландыруды тарту арқылы пилоттық жобаларды іске асыру тетіктері бойынша ұсыныстар қаралды. Қанат Бозымбаев ұйымдастырушылық іркілістердің алдын алу мақсатында пилоттық жобаларды іске асырып жатқан табиғи монополия субъектілері (ТМС) үшін нұсқаулық әзірлеуді тапсырды.
Бұдан бөлек, вице-премьер ТМС-тің электронды сатып алу платформасы мен EPC-мердігерлер мен жеткізушілерді іріктеу жүйесін жеделдетіп құруды және салалық мемлекеттік органдарға қажетті өнім көлемдерін айқындап, іріктеу кезеңінде барлық сыбайлас жемқорлық тәуекелдерін болдырмайтын тетіктерді әзірлеуді тапсырды.
Сонымен қатар Қанат Бозымбаев Smart Turmys бірыңғай платформасын іске қосу және есепке алу аспаптарына қойылатын стандарттар мен техникалық талаптарды әзірлеу үшін жұмыс тобын құруды тапсырды. Жеке жауапкершілік өнеркәсіп және құрылыс вице-министрі, жұмыс тобының жетекшісі Жәннат Дүбіроваға жүктелді.
Қанат Бозымбаев тиімді коммуникацияны қамтамасыз ету мақсатында инвесторлар, мердігерлер, отандық өндірушілер мен ТМС үшін call-орталықты және Ұлттық жобаны түсіндіру үшін энергетика және коммуналдық секторларды жаңғыртудың ресми сайтын іске қосуды тапсырды.
Ұлттық жобаны тиімді іске асыру мақсатында мүдделі мемлекеттік органдар арасында үйлесімді өзара іс-қимылды қамтамасыз ету бойынша жеке жауапкершілік ұлттық экономика вице-министрі Асан Дарбаевқа жүктелді.