Қарағанды облысында "Қалта ұрысы" жедел алдын алу іс-шарасы өтуде, - деп хабарлайды kazlenta.kz тілшісі Polisia.kz сайтына сілтеме жасап.
Қарағанды облысының аумағында қалта ұрлығын алдын алу мақсатында "Қалта ұрысы" атты жедел алдын алу іс-шарасы жүргізілуде. Бұл іс-шараның негізгі мақсаты – қалта ұрлығының алдын алып, осындай құқықбұзушылықтарға жол бермеу. Облыстық полиция департаменті мен оның аумақтық бөлімшелерінің қызметкерлері қоғамдық орындарда және қоғамдық көліктерде профилактикалық түсіндіру жұмыстарын белсенді түрде жүргізуде. Тұрғындарға ұрлыққа ұшырамаудың жолдары түсіндіріліп, сақтық шараларын сақтау қажеттігі ескертілуде. Сонымен қатар ұрлық фактісі орын алған жағдайда қалай әрекет ету керектігі жайлы нақты кеңестер берілуде. Жыл басынан бері автобустар мен қоғамдық орындарда 16 қалта ұрлығы тіркеліп, оның ішінде 2 қылмыстық іс бойынша күдіктілер жедел ұсталған.
Мысалы ақпанның 18-і күні 35 жастағы қала тұрғыны полицияға арыз түсіріп, аялдамалардың бірінде белгісіз адамның қалтасынан ұялы телефонын ұрлап кеткенін хабарлаған. Жедел іздестіру іс-шаралары барысында 25 жастағы күдікті ұсталып, қылмысын мойындады.