Алматылықтар FABRIQA жобасын қолдап отыр — алғашқы айда 20 тоннадан астам қажетсіз тоқыма жиналды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Жоба «Taза Қазақстан» республикалық бағдарламасы мен «Алматы — ортақ үйіміз» қалалық акциясы аясында іске қосылды. Қалада киім қабылдауға арналған 18 контейнер орнатылған, жақында тағы 22-сі қойылады. Киім Алматыда сұрыпталып, қайта өңделеді. Ескі киімнен өнеркәсіпке қажет қайта өңделген талшық пен сүртуге арналған шүберек алынады. Қайта пайдалануға жарайтын киімнің 13%-ы қайырымдылық ұйымдарына жіберіледі. Экологиялық әсері: қайта өңдеу нәтижесінде 74 000 кг CO₂-ға тең шығарындылардың алдын алынды — бұл мөлшерді жылына 3730 ағаш сіңіре алады.FABRIQA — Қазақстандағы мұндай ауқымдағы алғашқы жоба. Мақсаты — ай сайын 120 тоннаға дейін тоқыма жинап, тұрғындарды саналы тұтынуға және экологияға қамқорлық жасауға тарту.