Алматылық оқушылар көшбасшы мәртебесін тағы да дәлелдеді: қала командасы жаратылыстану-математикалық пәндер бойынша республикалық олимпиаданың командалық есебінде бірінші орын иеленді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Финалға еліміздің барлық өңірінен 955 оқушы қатысты. Теориялық және тәжірибелік екі турдың қорытындысы бойынша Алматы командасы «Қазақстанның үздік олимпиадалық командасы» деп танылды. Бас жүлдені НЗМ оқушылары жеңіп алса, бірінші орын Алматы мен Астана командаларына бұйырды. Сайран Сайфеденов, Алматы білім басқармасының басшысы: «Бұл жетістік – оқушылар мен ұстаздардың табанды еңбегінің жемісі. Алматы командасы бұл атақты қатарынан 23 жыл бойы сақтап, тұрақты және жоғары нәтиже көрсетіп келеді».Жеңімпаздар Қазақстан Республикасы Оқу-ағарту министрлігінің дипломдары, медальдар және бағалы сыйлықтармен марапатталды.