СҚО-да полицейлер экологтармен бірлесіп 116 стихиялық қоқыс үйіндісін анықтады, – деп хабарлайды kazlenta.kz тілшісі Polisia.kz сайтына сілтеме жасап.
2024 жылғы көктемнің соңынан бастап Солтүстік Қазақстан облысында стихиялық қоқыс үйінділерін анықтауға және жоюға бағытталған мобильдік топтар белсенді жұмыс істеп келеді. Полиция және экология департаменттерінің қызметкерлерінен құралған мобильдік топ рейдке 31 рет шығып, оның барысында қалдықтарды рұқсатсыз үюдің 116 орны анықталды, олардың 96-сы бүгінде жойылды.
Рейдтік іс-шараларды өткізу шеңберінде халыққа, кәсіпорындар мен ұйымдарға қоқысты шығару және сақтау ережелері, оларды бұзғаны үшін көзделген жауапкершілік туралы құқықтық түсіндіру жұмыстары мен жадынамалар тарату ұйымдастырылды.
Сәуір айында Мемлекет басшысының тапсырмасы бойынша "Таза Қазақстан" акциясы басталған сәттен бастап СҚО-да жалпыға ортақ пайдалану орындарын ластаудың 1881 фактісі және абаттандыру ережелерінің 9096 бұзушылығы анықталды. Акция аясындағы жұмыс ұдайы негізде жалғасуда.
Полицейлер солтүстікқазақстандықтар мен облыс қонақтарына аймақты абаттандыруға белсенді қатысуға шақырады. Экологиялық бастаманы қолдау арқылы әркім қоршаған ортаның тазалығына үлесін қоса алады. Егер сіз қоқыстың заңсыз шығарылуын немесе қалдықтардың жиналуын байқасаңыз, бұл туралы "102" нөміріне хабарлаңыз.