СҚО полиция департаментінің қызметкерлері ұстаған алаяқ 16 эпизод бойынша сотталды, – деп хабарлайды kazlenta.kz тілшісі Polisia.kz сайтына сілтеме жасап.
Солтүстік Қазақстан облысында өткен жылы 756 интернет-алаяқтық дерегі тіркелді, оның 180-нен астамы тегін хабарландыру сервистері және әлеуметтік желілер арқылы тауарлар мен қызметтерді сатумен байланысты.
Өткен жылы СҚО ПД криминалдық полиция қызметкерлері Қазақстан қалаларында, негізінен Петропавлда, шын мәнінде жоқ пәтерлерді белсенді түрде "жалға беріп келген" Алматы облысының 33 жастағы тұрғынын анықтап ұстады.
Ол пәтерлердің фотосуреттерін интернеттен алып, танымал сайттарда хабарландырулар орналастырған және хабарласқан әр клиентке пәтерді әлдебіреулер сұрап қойғанын айтып сендірген, алайда алдын ала төлем жасалса, жалға беруге келісетінін айтқан.
Бұл үшін ол 5 мыңнан 45 мың теңгеге дейінгі төлемді талап еткен, ал ақша қолына тиген соң, алданған адамның нөмірін бұғаттап, байланысқа шығуды тоқтатқан. Мұқият жүргізілген тергеуден кейін полицейлер осы істі 16 эпизод бойынша сотқа жіберді. Қазіргі уақытта алаяқ шартты түрде төрт жылға сотталды.
Полицейлер азаматтарды мұқият болуға шақырады. Егер сіз сатушының әрекетіне сенімді болмасаңыз, интернетте тауарлар мен қызметтер туралы хабарландырулар бойынша алдын ала төлем жасауға келіспеңіз.