Шымкентте өзгелерге жарты млн теңге шығын келтірген рецидивист ұры ұсталды, – деп хабарлайды kazlenta.kz тілшісі Polisia.kz сайтына сілтеме жасап.
Түрлі бағадағы телефондарды 40 жастағы ер адам мешіт келушілері мен сауда нүктелерінің сатушыларынан ұрлаған. Тағы бір дүкеннің жұмысшысының ақшасын да қолды еткен. Қаскөйдің қылмыстық әрекеттерінен төрт азаматқа жарты млн теңге шығын келтірілді.
Жәбірленушілердің бірінің айтуынша, оның мешітте қуаттағышта тұрған смартфоны жоғалған. Басқа тұрғынның арызына сәйкес, сауда ойын-сауық орталығының тұрағында тұрған велосипед те ұрланған.
Әл-Фараби ауданы полиция басқармасының жедел уәкілдері күдіктіні ЖБО-ның бейнебақылау камералары арқылы анықтап, ұстады.
Ер адам бұрын соңды ұқсас қылмыстар жасағаны үшін бірнеше рет сотты болған. Қазіргі таңда ол қамауда. Бөтеннің мүлкін бірнеше рет жасырын жымқырғаны үшін ол 7 жылға дейін бас бостандығынан айырылуы мүмкін.