Ауданда су тасқынынан зардап шеккендерге арналған тұрғын үйлердің құрылысы белсенді жүргізілуде, деп хабарлайды kazlenta.kz тілшісі ҚР Өнеркәсіп және құрылыс министрлігіне сілтеме жасап.
Аудан орталығынан басқа мердігерлер Қаратал, Ақкемер, Кемер, Ақжар және Бестамақ ауылдарында жұмыс істеуде.
Көпке мәлім, Ш.Берсиев атындағы ауылдық округінің орталығы – ең көп зардап шеккен ауылдар қатарында. Қараталда 133 үйдің құрылысы басталды. Оның 129-ында іргетасы құйылып, 90 үйде қабырғалар тұрғызылған, ал 40 үйдің шатыры жабылған. 20-дан астам үйде ішкі әрлеу жұмыстары жүріп жатыр. 15 үйге инженерлік желілер жүргізіліп, терезелер орнатылған.
Ойылда салынып жатқан 20 үйдің құрылысы қарқынды. Ақкемер елді мекенінде 16 үй, Ақжарда 5 үй, Кемер мен Бестамақта екі-екі үйден салынуда. Олардың көпшілігінде құрылысшылар үйлердің шатырын жауып, сылақ жұмыстарын және инженерлік желілерді жүргізіп жатыр.
Сонымен бірге Ойыл ауданының 129 отбасына қайталама нарықта дайын үйлер сатып алынды.
ҚР Өнеркәсіп және құрылыс министрлігінің Ахуалдық орталығының мәліметінше, Ақтөбе облысында барлығы 4 087 объектіге техникалық тексеру жүргізілді, оның нәтижелері бойынша:
- 511 үй салу - 511 басталды;
- 503 үй сатып алу - 406 сатып алынды;
- 3073 үйге жөндеу жұмыстарын жүргізу - 3003 аяқталды.